معجزه صارت ؟!

اللهم لك الحمد ..

قبل كل شيئ نتفق ان قلبي يكتب لكم مش يديني ولا عقلي ..

.

.

المعجزه لما تصير لك مو شرط شيء كبير ، اصغر الاشياء اللي يحبها قلبك و خير لك هي اللي راح تصير لك .

أنا ماعرفك ولا انت/تِ تعرفيني بس نتفق على شيئ ثاني مهما كان مكانك ولا دولتك ولا حالتك النفسيه ولا ضيقتك اللي مايعلم فيها الا ربي ولا الماديه ولا اي شيء كان ، تاكد ان ربي ما راح يخيب ضنك ولا يخيب دموعك ولا قلبك تذكر (  لَا تَحْزَنْ إِنَّ اللَّهَ مَعَنَا ) .

ربي يعلم كيف انت محتاج لشيء 

نبدا بقصتي البسيطه اللي انا احبها وصارت لي قبل ساعات قليله ..

يمكن عادي عندك بس عندي شيء كبير ❤️

 اول شيء لازم اعيد اختبار قدرات ( جامعيين ) وكان لازم ادفع 200 ريال سعودي ، كان موجود المبلغ بحسابي بس كنت عنيده ابغى امي تحط لي ميتين ريال بصرافتي ، السالفه قبل اسبوعين كل ما اذكرها تقولي دقايق وتنسى بسبب شغلها ما الومها ( والصدق ماكثرت عليها ) ، جاء اليوم تاريخ 22/3/1441 هـ قررت احدد موعد ، لما صحيت دخلت قياس ابحث عن وقت يناسبني مافي ولا وقت 😭

اطالع يمكن ماشوف 

الا مافي صدق 

وتضيق كيف بعيده مافي مجال لبعد التقديم 💔

واقفل الموقع و اسمع صوت المطر كانه رساله من ربي 

واجلس ادعي ادعيه من ضمنها ( ياربي اذا خير لي اعيده فسهله لي ويسر لي مقعد يارب واجبر لي خاطري يارب لا حول ولا قوه لي الابك يارب ارزقني من حيث احتسب ومن حيث لا احتسب يارب  .... ) االحكي الساعه 4.25 العصر ، وتجي 6 المغرب فجاءه احساس ادخل الموقع لما دخلت 

ياااارب ياحبيبي الوقت اللي ابغاه و الساعه و التاريخ مع انه وربي شفت الموقع اكثر من عشرين مره وعلى طول 

اركض واسجل فيه .. اللهم لك الحمد 💕

نجي لشيء الثاني ..

انا انسانه ما احب اطلب من احد شيء مهما كان قريب الا بشيء واحد يعطيني بس ( دين ) ، ( سلف) المهم

مع الهبه ابي اكتتب ب ارامكو باسمي ( بعطيكم امثله على المبلغ ) ..

كان بخاطري اكتتب قلت شكلي بكتتب بس ب 300 ريال سعودي ، وجلست مع اختي قالت مايكفي انا بعطيك 1000 ريال سعودي قلت لا ، انا بكلم احد يسلفني 1000 تدرين المهم وارسل لاختي الثانيه ( ...............من ضمنه ممكن سلف 1000 ريال .......) 

تاخرت ما ردت واسمع صوت المطر حبيبي واركض ركض 

واجلس ادعي ياررب (......... اذا خير لي اني اكتتب فسهل لي ويسر و ارزقني من حيث احتسب ومن حيث لا احتسب ....) واكمل يومي عادي و اسوي كيكه 😏 بعدين الطريقه 

المهم ولا ابوي جاء قالي يابنيتي لك 2000ريال سعودي هديه ، ياااربي ياحبيبي كيف ربي سهل لي ورزقني اضعاف مضاعفه ..

وانتهى 

على انها اشياء بسيطه بالنسبه لي و لك الا فرقت بقلبي شيء كبير ، كيف ربي قريب لنا وحنا غافلين ..

ربي كريم ربي يجبر قلبك مهما ضاقت بس ارفع يدينك لربك ..

اللهم لك الحمد .. لا حول ولا قوة الا بالله .

نصيحه ..

لا تفكر تمد يدك للبشر قبل تمد يدك لربك لان ربي اكرم من اي شخص موجود بالدنيا ..

جاك رابط المدونه بوقته لانه رساله لك ..